Entertainment, News, Photo » साझा बस चढेर प्रधानमन्त्री सिंहदरबार पुगे, बस चढ्नुअघि भने–म खलाँसी हुँ

काठमाडौं, मंसिर १२ – जहाँ गएपनि चिल्लो कारमा झण्डा हल्लाउँदै पुग्ने प्रधानमन्त्री पुष्पकमल दाहाल प्रचण्डले आइतबार साझा बस चढ्नुभएको छ । साझा यातायातले काठमाडौंमा नयाँ बस सुरु गरेको कार्यक्रममा पुल्चोक पुगेका प्रधानमन्त्रीले त्यहाँदेखि सिंहदरबारसम्म साझा बसमा यात्रा गर्नुभएको हो । प्रधानमन्त्रीसँगै भौतिक पूर्वाधार तथा यातायात मन्त्री रमेश लेखक लगायत अरु विशिष्ट व्यक्ति पनि साझा बस चढेर सिंहदरबार पुगे ।



साझा बस चढ्नुअघि प्रधानमन्त्रीले आफू देशको खलाँसी भएको बताउनुभयो । नयाँ बसको शुभराम्भ गर्दै उहाँले भन्नुभयो, ‘मैले के ठानेको छु भने म अहिले खलाँसी नै छु । खलाँसी नै छु र मैले बल गरिराखेको छु सबै मिलेर बसौं भनेर । तपाईहरुले पनि सबैतिरबाट मिलेर बस्न आग्रह गर्छु ।
कार्यक्रममा हाँस्यव्यंग्य कलाकार मदनकृष्ण श्रेष्ठ र हरिवंश आचार्य महजोडीले कार्यक्रममा खलाँसीले गाडीमा महिला पुरुष, जातजाती सबैलाई मिलाउनेगरेको उल्लेख गरेपछि प्रधानमन्त्रीले आफुलाई खलाँसीसँग तुलना गर्नुभएको हो ।


प्रधानमन्त्री दाहालले साझा यातायात सुरक्षा र सहज गन्तव्यका लागि भरपर्दो माध्यम भएको पनि बताउनुभयो । उहाँले पहिलेको कुरा सम्झँदै साझाको टिकट लिदा गर्वको अनुभूति हुने गरेको समेत उल्लेख गर्नुभयो । दोस्रो पटक सरकारको नेतृत्व गर्दै गर्दा देशभित्र बढी यातायात दुर्घटना हुने गरेको अवस्थामा अराजक यातायात व्यवस्थालाई अन्त्य गर्न सरकार प्राथमिकताका साथ नीति र नियममा कठोर भएको बताउनुभयो ।



अहिले ट्राफिक र यातायात व्यवस्थामा सुधार हुँदै गएको भन्दै उहाँले सरकार आफैले पनि झण्डै सय बस चलाउने तयारी गरिरहेको जानकारी दिनुभयो । उहाँले चौडा सडक ठूला बस र शहरलाई जोड्न आवश्यक रहेको बताउनुभयो । बढ्दो सहरीकरण र अव्यवस्थालाई सही व्यवस्थामा ल्याउन सरकार र निजीक्षेत्र सबै मिल्नुको विकल्प नभएको पनि उहाँले बताउनुभयो । उज्यालोअनलाइनबाट

2 comments

Write Down Your Responses